Partilhamos um texto de um nossos oradores Alcides Meirinhos:
L outro die nua cumbersa suobre nada i suobre todo nua ruodra d’amigos, cun amigos de amigos, a cierto andar diç assi un tal de Chaínça :
– Ah! És de Miranda? Sim , sim .. Conheço, conheço …
Quedei todo amproado porque eilhi staba la proba probada que Miranda benie nos mapas de las cabeças de la gente.
– Fica no topo daquela língua de terra plana nascida entre vales profundos e abruptos amuralhada por precipícios que emergem do espelho de água da barragem como setas a apontar o céu. No topo um castelo em ruínas e do outro lado a sé! Imponente a sé, emerge majestática por entre telhados vermelhos das casas de dois andares na encosta voltada a poente.
Más prouisto quedei, la amponéncia de la sé! L castielho, la barraige i l penhedo amarielho … anchi l peito d’aire i nien un garbancico me cabie.
– Anton biste l dous?
– Não, qual dois?
– Bó!! stubiste an Miranda i nun biste l dous? … I l Nino Jasus de la Cartolica? I la Carranca de la Sé? I la Casa de las Quatro Squinas? I la eigreija de la Mezericórdia? I la ruga de la Costanielha?
– Pois … sabes, na verdade só lá estivemos uma manhã … de passagem … porque agora com as estradas que há é sempre a “conhecer” locais diferentes.
Quedei cumo quien ceba i nun mata, conhecie Miranda, conhecie … chuoco ye que conhecie. Passou alhá! I apuis diç bien rexerto cun cara de turista biajado por todas las squinas de mundo:
– Já lá estive!
Sacou uns retraticos, publicou-los nas redes sociales i ála a meter ambeija! Tunticos. Assi tamien you. You tamien conheço Lyon na Fráncia, mudei alhá de abion mas nun sali de l eiroporto. França?! Anton nun conheço ….
Por outro lhado, tamien hai la outra parte: personas que se antréssan, personas que scugítan todas las buracas an busca nien eilhes sáben mui bien de quei, talbeç l Santo Graal! You que sei… cumo diç un amigo, los segredos nun se assóman a las stradas!
Un pouco cumo un casal a quien l amentórun na Tierra de Miranda. Oubiu dezir que habie ua tierra nuas praineiras para alhá de las sierras, de los montes i de los rius.
– Olha querida, um dia destes marcamos uma ida a Miranda do Douro, dizem que se come lá melhor do que num convento cheio de abades barrigudos.
– Pois, para comer aposta pai que não perdes … marca lá então. Quanto tempo achas que necessitamos para conhecer essa terra? Um fim de semana? Um fim de semana deve dar e ainda podemos dar uma saltada a Zamora ou a Salamanca, afinal ficam tão perto!!
I alhá se botóran a camino pulas nuobas stradas. Fui nun relhampo que alhá se puníran i al fin de tarde apuis duns cerrados i uas cortinas cun boiadas a pacer, al zancubrir por antre freznos i carrascos saliu un …
– Ah!! A Sé!!! Pára! pára!
– Mais ali á fente … espera
I fúran andando cumo nua cuonta de fadas i mouras ancantadas caras a aquel menumento que a essa hora parecie inda maior que l restante de la cidade andrento de las muralhas. Yá staba cerrado mesmo sendo de die, mas an Júlio ls dies son grandes i l sol pon la frunteira de l menumento inda cun más lhuç. Dóran la buolta al redor, pisóran l sagrado i deilhi de riba de la muralha que queda al nible de l sagrado assomóran-se al riu, sereno cumo l bolo de ls alcaforros an redundel cumo bejilantes de l tiempo.